2002 ഇൽ പ്രശസ്ത സംവിധായകൻ ശ്രീ ഫാസിൽ സംവിധാനം ചെയ്ത കയ്യെത്തും ദൂരത്തു എന്ന സിനിമയിലൂടെ മലയാള സിനിമയിലേക്ക് കടന്നു വന്ന ഒരു ഇരുപതു വയസ്സുകാരൻ ഉണ്ടായിരുന്നു. ഉപ്പയുടെ സിനിമയിലൂടെ ഒരു സിനിമാ ജീവിതം തരപെടുമോ …അല്ലെങ്കിൽ തന്റെ മകനും ഒരു വഴിത്തിരിവാകട്ടെ എന്ന് കരുതി ഒരു സോഫ്റ്റ് ലോഞ്ച് .. അതും തന്റെ തന്നെ സിനിമയിലൂടെ .. എന്നൊക്കെ കരുതിയാവാം .. എന്തായാലും സിനിമ കാര്യമായ ചലനമൊന്നും ചലച്ചിത്രരംഗത്തുണ്ടാക്കിയില്ല എന്ന് മാത്രമല്ല … ഇത് തന്റെ ഫീൽഡ് അല്ല എന്ന് മനസിലാക്കിയിട്ടോ ..അതോ സിനിമാരംഗത്തോട്ടു എത്താൻ തനിക്കിനിയും സമയമായിട്ടില്ല എന്ന തിരിച്ചറിവൊ … കയ്യെത്തും ദൂരത്തിലെ നായകൻ ഫഹദ് ഫാസിലിനെ പിന്നീടങ്ങോട്ട് ഒരാറെഴു കൊല്ലത്തേക്ക് ആരും കണ്ടിട്ടില്ല.

പിന്നീട് 2009 ഇൽ ഇറങ്ങിയ ആന്തോളജി വിഭാഗത്തിൽ പെടുത്താവുന്ന കേരളാ കഫെ എന്ന സിനിമയിൽ ആണ് ഫഹദിനെ മലയാളികൾ കണ്ടത്. അവിടുന്നങ്ങോട്ട് മലയാളികളെ മാത്രമല്ല …സിനിമയെ സ്നേഹിക്കുന്ന ,കലയെ സ്നേഹിക്കുന്ന ,ദേശീയ തലത്തിൽ തന്നെ ശ്രദ്ധയാകർഷിച്ച ഒരു അസാമാന്യ പ്രതിഭ എന്ന തലത്തിലേക്ക് ഫഹദ് എന്ന നടൻ വളരുന്ന ഒരു കാഴ്ചയാണ് സിനിമാപ്രേമികൾ കണ്ടത്… അറിഞ്ഞത്.. അനുഭവിച്ചത്‌.

ചാപ്പ കുരിശ്ശ് , അകം ,22 ഫീമേൽ കോട്ടയം , ഡയമണ്ട് നെക്‌ളേസ്‌ , അന്നയും റസൂലും , ആമേൻ , നോർത്ത് 24 കാതം , ആർട്ടിസ്റ് , ഒരു ഇന്ത്യൻ പ്രണയകഥ , നത്തോലി ഒരു ചെറിയ
മീനല്ല , ഗോഡ്സ് ഓൺ കൺട്രി , ഇയ്യോബിന്റെ പുസ്തകം, മണിരത്‌നം , അയാൾ ഞാനല്ല , കാർബൺ, ട്രാൻസ് , സി യു സൂൺ , മലയൻകുഞ്, പാച്ചുവും അത്ഭുതവിളക്കും , മനോരഥങ്ങൾ , ബോഗൺവില്ല ,
ബാംഗ്ലൂർ ഡേയ്സ് , ഇമ്മാനുവേൽ , പ്രമാണി , മഹേഷിന്റെ പ്രതികാരം , ടേക്ക് ഓഫ് , തൊണ്ടിമുതലും ധൃക്‌സാക്ഷിയും , ഞാൻ പ്രകാശൻ , വരത്തൻ , ജോജി, കുമ്പളങ്ങി നൈറ്റ്സ് , മാലിക് , മാമന്നൻ, വേലൈകാരെൻ
പുഷ്പ 1 & 2 , വിക്രം , വേട്ടയ്‌യാൻ ,ആവേശം എന്നിങ്ങനെ കൈവച്ചതു മുഴുവൻ ഒരുമാതിരി എല്ലാ സിനിമകളും വിജയത്തിലേക്കെത്തിക്കാൻ സാധിച്ച ചുരുക്കം ചില അഭിനേതാക്കളിൽ ഒരാൾ … ഫഹദ് ഫാസിൽ !!!

പതിനഞ്ചു വർഷങ്ങൾക്കുള്ളിൽ അറുപതോളം സിനിമകൾ ..അതിൽ തന്നെ തെലുഗിലെ അല്ലു അർജുനോടൊപ്പവും , തമിഴിലെ സൂപ്പർ താരങ്ങളായ രജനികാന്ത്, കമൽ ഹസ്സൻ ,ശിവ കാർത്തികേയൻ , വടിവേലു , ഉദയനിധി സ്റ്റാലിൻ എന്നിവർക്കൊപ്പം നായകതുല്യ കഥാപാത്രവും പ്രതിനായകനായും ഒക്കെ തെക്കേ ഇന്ത്യയിലെ സിനിമാ മേഖലയിൽ ഒന്നൊഴിയാതെ നിറസാന്നിധ്യമായി .. നായകവേഷമോ , പ്രതിനായകവേഷമോ , സഹനടനായോ , ഗസ്റ്റ് റോൾ ആയോ സ്വഭാവ നടനായോ ആക്ഷനും,
റൊമാന്സും , സെന്റിമെൻറ്സും മാസും അങ്ങിനെ
ഒക്കെ തനിക്കു ചെയ്തു ഫലിപ്പിക്കാൻ സാധ്യതയുള്ള ഏത് വേഷവും ഭദ്രതയോടെ ഏല്പിക്കാൻ ഇന്ന് സംവിധായകർക്കും നിര്മാതാക്കൾക്കും ഒരുപോലെ തങ്ങളുടെ സിനിമയെ ഏല്പിക്കാൻ തക്കവിധം ഒരു നല്ല അഭിനേതാവായി , കലാകാരനായി ഫഹദ് .. മലയാളികളുടെ പ്രിയപ്പെട്ട ഫഫ .. മാറിയിരിക്കുന്നു.

ചില പ്രത്യേക ഭാവങ്ങൾ .. അതും തന്റെ കണ്ണുകളിലൂടെ പ്രകടിപ്പിക്കുന്ന .. അത് വൃത്തിയായി അഭിനയത്തിൽ കൊണ്ടുവരുന്ന വളരെ ചുരുക്കം നടന്മാരെ ഇന്ന് ഇന്ത്യയിൽ ഉള്ളൂ .. അതിൽ മുൻപന്തിയിൽ ധൈര്യത്തോടെ നിർത്താവുന്ന ഒരു കലാകാരൻ ആണ് ഫഹദ് ഫാസിൽ. ഷമ്മിയും , ജോജിയും, മഹേഷും , അലോഷിയും , പ്രസാദും , ഭാൺവെർ സിംഗ് ശെഖാവത് , പ്രകാശൻ , സിറിൽ , അയ്മനം സിദ്ധാർഥ് , ഏജന്റ് അമർ എന്നിങ്ങനെ വ്യത്യസ്തതയുടെ കൂമ്പാരമായി അറുപതിലേറെ കഥാപാത്രങ്ങൾ … കണ്ണുകൾ കൊണ്ട് കഥപറയുന്ന , സൂക്ഷ്മതയോടെ കൊണ്ടുവരുന്ന ഭാവപ്രകടനങ്ങൾ, ചടുലമായ നടനം , പക്വമായ ചിരി, വ്യക്തതയാർന്ന നിലപാടുകൾ, സംസാരശൈലി ഒടുക്കം ആവേശത്തിലെ രംഗ അണ്ണൻ വരെ എത്തിനിൽക്കുന്ന ഫഹദിനെ കുറിച്ച് പറയാൻ തുടങ്ങിയാൽ ഈ കുറിപ്പവസാനിക്കുകയില്ല.

നടനും നിർമ്മാതാവും എന്ന നിലയിൽ പ്രശസ്തിയിൽ നിൽക്കുന്ന ഫഹദ്, ഈ കുറഞ്ഞ കാലയളവിൽ നേടിയത് നാഷണൽ ഫിലിം അവാർഡും , കേരളാ സ്റ്റേറ്റ് ഫിലിം അവാർഡ്‌സും , നാല് തവണ ഫിലിം ഫെയർ അവാർഡ്‌സ് സൗത്ത് എന്നിങ്ങനെ ഉള്ള അംഗീകരങ്ങളും ആണ്. ഇതിനോടകം തന്നെ ഏറ്റവും കൂടുതൽ പ്രതിഫലം വാങ്ങുന്ന സൗത്ത് ഇന്ത്യയിലെ ചുരുക്കം താരങ്ങളുടെ പട്ടികയിലേക്ക് അതിവേഗം വളരുകയും ചെയ്തു നമ്മുടെ
പ്രിയങ്കരനായ ഫഫ.

മലയാളത്തിലെ തന്നെ മുൻ നിരനായിക എന്ന നിലയിലേക്ക് വളരെ വേഗം ഉയർന്ന നസ്രിയ നാസിം ആണ് ഫഹദിന്റെ ജീവിതപങ്കാളി. മറ്റൊരു പ്രത്യേകത ഞാൻ ശ്രദ്ധിച്ചത്, ഫഹദിന്റെ സിനിമകളിലെ പേരുകളാണ്… വളരെ കുറവ് മാത്രമാണ് ടൈറ്റിൽ റോളുകളിൽ ഫഹദ് അഭിനയിച്ചിട്ടുള്ളത് … എന്നാൽ കഥാപാത്രത്തിന്റെ പേര് ടൈറ്റിലിൽ ഉണ്ടാവുകയും ചെയ്യും… ഫഹദിന്റേതായി ഇനി ഇറങ്ങാനുള്ള മലയാള സിനിമകളും ഏതാണ്ട് അത്തരത്തിൽ തന്നെയാണ്… ഓടും കുതിര ചാടും കുതിര, കരാട്ടെ ചന്ദ്രൻ , മമ്മൂക്കയും മോഹൻലാലിന്റേയും ഒപ്പം മഹേഷ് നാരായണന്റെ സിനിമ , നെസ്ലെനുമായി ടോർപിഡൊ എന്നിവയാണ് ഫഹദിന്റേതായി ഇനിയിറങ്ങാനുള്ള മലയാളം സിനിമകൾ. തമിഴിൽ മരീസനും തെലുഗിൽ ഡോണ്ട് ട്രബ്ൾ ദി ട്രബ്ൾ എന്ന സിനിമയും ഇനിയിറങ്ങാനുള്ള ഫഹദ് ചിത്രങ്ങൾ ആണ്.

നല്ലൊരു സുഹൃദ് വലയം കാക്കുന്നതിൽ അതീവ ജാഗ്രത പുലർത്തുന്ന ഒരു വ്യക്തി കൂടിയാണ് ഫഹദ്. ദിലീഷ് പോത്തൻ ശ്യാം പുഷ്ക്കരൻ കൂട്ടുകെട്ടിൽ ഉണ്ടാക്കിയെടുത്ത ഭാവന സ്റ്റുഡിയോസ് എന്ന ഡിജിറ്റൽ എന്റർടൈൻമെന്റ് കമ്പനിയും നസ്രിയയുമായി ചേർന്നു തുടങ്ങിയ ഫഹദ് ഫാസിൽ ആൻഡ് ഫ്രണ്ട്‌സ് എന്ന പേരിലുള്ള നിർമാണ കമ്പനിയും ആ സുഹൃദ് വലയത്തിന്റെ തെളിവാണ്. രാജ്യം കോവിടിനാൽ വലഞ്ഞപ്പോൾ സഹായഹസ്തമായും , നാട് പ്രളയക്കെടുതിയിൽ
പെട്ടപ്പോഴും വയനാട് ഉരുൾപൊട്ടലിൽ പ്രകൃതി നാശം വിതച്ചപ്പോഴും , മറ്റു അവശ്യ സന്നർഭങ്ങളിലും ആശ്വാസമായും എത്തുവാൻ ഫഹദും നസ്രിയയും മുൻപന്തിയിൽ തന്നെ ഉണ്ടായിരുന്നു.

ഇനിയും ഒരുപാട് സിനിമകളിലൂടെ കഥാപാത്രങ്ങളിലൂടെ മലയാളികൾക്ക് പ്രിയങ്കരനായ ഫഹദ് കൂടെ തന്നെയുണ്ടാകട്ടെ എന്ന് ആശിക്കുകയും കൂടുതൽ നല്ല സിനിമകളുടെ ഭാഗമാകാൻ ഇനിയും സമയവും സാഹചര്യവും അനുവദിക്കട്ടെ എന്നും ആശിക്കുന്നു… ആശംസിക്കുന്നു.

VV